كتير جدا من الناس ما كلهم طبعا بس الشر يعم، طيبتهم مصيبتهم بالرغم من إنو الدين الحنيف وصى على المعاملة و حسن الظن بالناس و كتير من وصايا الدين السمحة لكن الشغال بيها منو؟
في نوع من البشر ربنا خلقهم للأذى و سبحان الله بتلقى عمرهم طويل لدرجة إنو حتى الصداع ما بجيهم أما الطيبين ربنا بختارهم لحكمة يعلمها الله وحده و يرحمهم من الدنيا، كم من الناس إتعاملت بحسن النية و إتجازت بشر الجزاء في الدنيا طبعاً في الآخرة أجرهم محفوظ لأنهم ممكن يدخلوا في الايه الكريمة ﴿ و الكاظمين الغيظ و العافين عن الناس ﴾
و أصعب حاجة كظم الغيظ، في كتير من الناس ما بتحملوا ليه نحن دائماً بنحب الأذى للغير؟، إلا من رحم ربي، ليه بنفرح لمن نشوف غيرنا متضايق؟، ليه ما بنتمنى الخير لبعض؟،
الناس نفوسها مريضة بالحسد و الغل و الحقد من أقرب الناس، ليه بنفهم غيرنا غلط و بنعاين من إتجاه واحد؟،
ليه بنستغل الطيبة؟، و سبحان الله الطيب بدوسو عليه و المؤذي بقيموه، في ناس ربنا خلقهم عفويين ألفي قلبهم على لسانهم، و دي أكبر مشكلة ممكن تكون بالنسبة ليهم، في ناس بتفتش ليك ذرة غلط و تعمل من الحبة قبة، زمان كانت قبة هسي بعمل منها طوابق عادي.
المهم يا أهلي الطيبين…
خاوي البسندك وقت الوجع يسخالك
خاوي البرفعك عكاز ضراك يبقالك
ما تخاوي الخسيس البي وراك يغتالك
إختار الرفيق لمن تضيق يسعالك
